KALIBO, Aklan—Halin sa P4,000 pesos per bag, nagnaba eon ro presyo it sibuyas sa P3,400 hasta P3,200 pesos sa mga baealigyaan sa Kalibo public market.
Bangud kara, bumagsak eon sa P450 pesos halin sa dating P500 pesos ro kada kilo it lokal nga sibuyas ag P380 pesos halin sa P400 pesos ro kada kilo it taal ukon maisot nga klase base sa ginpatigayon nga price monitoring it Bombo Radyo Kalibo.
Ko tiempo it paskwa hasta Ati-Atihan festival, nag-abot sa P500 hasta P600 pesos kada kilo ro baealigyaan it sibuyas.
Nagaeaum ro pilang mga vendors nga padayun eon nga maganami ro baealigyaan it sibuyas ag magabalik eon ro andang mga suki.
Suno kay Annie Gamboa, sambilog sa mga vendors sa Kalibo public market nga ro amat-amat nga pagnaba it presyo it sibuyas hay bangud sa pagtaas it ani sa mga probinsiya partikular sa Pangasinan.
Sa maabot nga Marso hasta Abril, ginapatihan nga magiging establi eon ro presyo it sibuyas ag magiging bastante ro supply bangud sa pag-ani sa probinsiya it Mindoro kun sa siin nagahalin ro maabu nga supply it nasambit nga produkto.
Sa pihak nga parte, naging emosyunal si bangud sa owa it pundo nga importasyon nga ginahimo it gobyerno nga imaw suno kana ro nagapatay sa mga mangunguma sa nasyon.
Maskin nga owa suno kana it direktang epekto kandang mga negosyante ro ginapatigayon nga importasyon it mga agricultural products, apang nakikisimpatiya imaw sa baeatyagon it mga farmers bangud nga dati man imaw nga mangunguma.
Madumduman nga gin-anunsyo it gobyerno ro pag-import it masobra sa 21,000 metric tons it sibuyas para mapanaba ro presyo kara.
