BORACAY, Island — Nagpahayag ro Police Regional Office 6 (PRO-6) it determinasyon nga maiserbe ro hustisya sa pagkamatay it Slovakian national nga nasapwan eon lang nga una sa state of decomposition sa c.r it abandonadong chapel nga sakop it sangka resort sa Sitio Pinaungon, Brgy. Balabag sa isla it Boracay, hapon it Miyerkules, Marso 12, 2025.
Ginapangunahan makaron it Police Regional Office VI ro madaeom ag maid-id nga imbestigasyon agud nga matumod ro sa likod it krimen matapos nga makit-an eon lang ro dumueoong turista nga si Michaela Mickova, 23-anyos it nasyong Slovakia nga uwa it underwear, ag ginapatihan nga ginhimuslan it makapilang beses matapos sa nakit-an nga klase it anang maselan nga parte it eawas.
Ginpasiguro it pulisya kabulig ro komunidad it Boracay ag probinsya it Aklan nga pagatutukan ro insidente agud nga maaresto ro mga suspek bangud sa uwa sigon it puwang ro krimen sa Western Visayas.
Ginpasiguro it Police Regional Office 6 nga magapabilin ro kalinungan ag seguridad sa Boracay sa pihak it natabo nga krimen nga ginakabig nga sangka isolated incident.
Tuyo nanda makaron nga mataw-an it nagakaigong nga hustisya ro pamilya ag mga pinalangga sa kabuhi ni Michaela, nga kilaea bilang mapinalanggaon nga onga, abyan ag daeaga nga may handom sa kabuhi.
Padayon nga ginapadumdom it PRO-6 nga nagapabilin nga eowas ro Boracay para sa mga turista, samtang nagapanawagan sanda it kooperasyon halin sa komunidad agud nga mapadasig ro pagkaaresto sa mga suspek kamana man agud nga masentensyahan ro mga raya sa andang ginhimo nga krimen.
Nasayuran nga ko Marso 1 nag-abot sa Boracay ro nasambit nga turista agud nga magtambong sa kasae it anang Pinay nga amiga.
Apang, ko Marso 10, adlaw it Lunes hay ginreport raya sa mga otoridad nga missing ag nagtaeana pa it P50,000 pesos nga reward money sa makakita kana hasta nga ko hapon it Miyerkules, Marso 12 hay nasapwan eon lang raya sa posisyon nga bukon it makatawo nga kamatayon.
