Nagpaguwa it paandam ro Police Regional Office 6 (PRO – 6) sa mga pumueuyo angot sa potensyal nga peligro it pag-atake it mga budol-budol gang ag iba pa nga kriminal nga nagapuntirya sa mga manugbakae sa holiday season.
Suno kay Lt. Col. Arnel Solis, spokesperson it PRO-6 nga ro mga nagapamakae hay dapat nga maging mapagbantay ag magdahan sa mga indibidwal nga may makadueuda nga hueag.
Ginpaathag pa nana nga ro modus operandi it budol-budol gang hay naga-sentro sa pagpakita it mga bugkos it kuwarta agud mabo-oe ro pagsalig it biktima, apang sa ulihi matukiban nga ro bugkos it kwarta hay puro blangko nga papel.
Ginpahayag dugang nga sa makaron hay owa pa it may nailistang nabiktima kara sa rehiyon, apang mas mayad sigon nga makaangkon it temprano nga pagdahan.
Sa pihak nga parte, nagpaguwa man imaw it ginatawag nga “practical shopping tips” agud mabuligan ro publiko.
Dapat suno kana nga likawan ro pagdaea it mabahoe nga kantidad it kuwarta kamana man ro pagpakita it mga maeahaeon nga mga alahas ag iba pa.
Gin-abiso pa it PRO-6 sa tanan nga manugbakae nga i-report sa pinakamaeapit nga police station ro anuman nga makadueuda nga aktibidad bangud naga-enjoy ro mga raya kada holiday season.
