KALIBO, Aklan–Sa pihak it paghina it linyada it armadong galamay it Communists Party of the Philippines, ro New People’s Army, padayon nga nakabantay ro Philippine National Police ukon PNP ag iba pang law enforcement agency sa posibleng pagpakalhit nanda it kinagamo kadungan sa pagdumdum it andang ika-53 anyos nga anibersaryo.
Raya ro ginpahayag ni P/Lt. Col. Arnel Solis, tagapaghambae it Police Regional Office ukon PRO-6.
Suno kay Solis nga indi eon kinahangean nga magpataas pa it alert level para eamang sa NPA anniversary bangud nga pirme man sanda nga naka-alerto kontra sa communist terrorist group nga hasta sa makaron hay owa pa nagatalikod sa andang ginapakigsukoe umpisa ko Marso 29, 1969.
Ginklaru dugang nga owa man sanda nagpanaog it alerto bilang pagpahaum sa nagahilapit nga eleksyon sa mayo 9 agud nga magiging maayos, malinong ag malimpyo ro matabu nga bueutohan.
Samtang, dere-deretso man sigon ro andang pagpabaskog sa intelligence network ag ginahimo nga koordinasyon sa AFP nga kabulig nanda sa pagpatuman it seguridad.
Bangud nga tadisyunal sigon ro pagpatigayon it pag-atake it NPA sa mga pulis ag soldado kada andang anibersaryo bilang pagpakita it pwersa, nagahimo man sanda it nagakaigo nga tikang agud nga makontrol ro anuman nga terrorist plot it mga komunista.
Makabig suno kay solis nga nag-euya eon ro NPA bangud sa mga napatay nanda nga miyembro sa mga natabu nga encounter, samtang ro iba hay nagbalik sa sabak it gobyerno ag ro iba hay naaresto ag nakulong sa pag-serbi kanda it warrant of arrest sa mga ginapangatubang nga kaso.
Sa pihak nga parte, gin engganyo ni solis ro mga gustong magbalik sa sabak it gobyerno nga makipag-angot eamang sa pinakamaeapit nga police station, headquarters it AFP ukon sa mga natungdan nga lokal nga gobyerno.
