KALIBO, Aklan—Ginkumpirma it Office of the Provincial Agriculturist nga kueang gid man ro produksyon it bugas makaron nga tiempo sa probinsiya it Aklan.
Suno kay Engr. Alexis Apolonio, head it OPA nga kaeabanan sa raya nga buean hay sangkiri eon ro supply bangud nga tapos eon ro ani it nagtaliwan nga cropping.
Maskin sigon ro andang taeatapan hay nabudlayan nga makabakae it paeay sa mga mangunguma bangud sa kawad-an it supply sa pihak it mataas nga gina-offer nga maka compete sa mga traders.
Nagadaeagan sigon sa 24 hasta 25 pesos per kilo ro andang pamakae sa uga nga paeay nga ginadaea sa andang warehouse sa Brgy. Nalook, Kalibo.
Sa pihak kara, kumpiyansa man si Engr. Apolonio nga sa pagsueod it buean it Setyembre hay magasaka eon ro produksyon sa probinsiya.
Apang nagakabaeaka man sanda sa posibleng epekto it El Niño phenomenon.
Sa pihak nga parte, gindugang pa ni Engr. Apolonio nga ro Aklan hay makabig nga bukon it rice sufficient province maskin nga tamnan ro tanan nga mga available nga kaeananasan.
Bangud sa pagiging tourism destination kara , nagakinahangean it maabu nga supply it bugas rason nga nagasalig kita sa pag-import sa ibang probinsiya.
Panawagan kara sa mga pumueuyu nga magtipid ag indi mag uyang it bugas ag humay.
