KALIBO, Aklan—Agud nga mabuligan ro mga estudyante makarun nga tyempo it krisis bangud sa COVID-19, naglunsar ro Project Kalibo it sangka proyekto nga ginatawag “ baylo, barter for a cause ”.
Tuyo it nasambitan nga proyekto nga makatipon it kapin sa 5,000 nga mga radyo para ipanudpod sa mga estudyanteng hugot nga nagakinahangean it gamit para sa andang pagtuon.
Prayoridad man kara ro mga naga-istar sa maeayong lugar kung sa siin, radyo eamang ro pwedeng magamit agud makaangkon it access sa edukasyon.
May kaangtanan kara, gin-engganyo it sambilog sa mga proponent it Project Kalibo nga si John Marlou Salido ro tanan nga mga pomoueyo sa probinsya it Aklan nga magkipagbuligan kanda.
Suno kana nga maabong pamaagi agud ro sangka indibidwal hay magapaabot it andang bulig.
Pwedeng mag-donate it mga “pre loved dress” ukon ro mga naggamit eun nga eambong ag nagatambak manlang sa andang baeay.
Nagabautun man sanda it cash donation ukon mismong radyo.
Nasayuran nga makarun hay hugot nga ginabawaean ro face-face-learning agud nga malikawan ro pagkalhit pa it COVID-19.
Sambilog ro radyo sa mga pamaagi it Department of Education agud nga makapaabot it adukasyon sa mga estudyante.
Sa probinsya it Aklan, ginatantsya nga kapin sa 100,000 nga mga estudyante ro owa it ikasarang nga magbakae it radyo para mapadayun ro andang pagtuon sa tunga it paeag it pandemya.
