Eubusan eon nga naaprubahan sa Manabang Kapueungan it kongreso ro House Bill no. 14 ukon proposisyon nga SIM Card Registration sa botong 250 affirmative, 6 negative ag 1 abstention.
Sa idaeom it proposisyon, tanan nga public telecommunications entity (PTE) ukon authorized seller hay paga-obligahon ro ‘end user’ ukon mga SIM card user, Pilipino man ukon dumueo-o nga iregister ro andang prepaid ukon postpaid SIM.
Ginaeauman nga sa raya nga pamaagi hay mapunggan ro nagkaeain-eain nga krimen ag iligal nga aktibidad gamit ro mobile phone.
Ro end user hay kinahang-ean fill upan ro form nga gin-isyu it PTE kaeakip ro pagpakita it valid identification card.
Ano mang impormasyon sa registration document hay pagakabigon nga confidential mag-euwas eamang kung pagapasugtan it subscriber sa pamaagi it sangka kasueatan.
Kinahang-ean man ipagguwa ro impormasyon kung imandu it korte ukon law enforcement nga paga-gamiton para sa imbestigasyon.
Ro mga SIM cards nga naibaligya ukon gin-isyu eon antes pa maging epektibo ro laye hay kaibahan man sa igapa-rehistro.
Sangka registry ukon listahan it tanan nga subscriber kaeakip ro andang assigned sim card number ro pagabilugon it PTEs mag-euwas pa sa pagsumite it andang authorized seller/agent sa National Telecommunications Commission.
Magapangatubang sa P300,000 hasta P1 million nga multa kung mag-eabag ro PTE sa laye samtang suspensyon sa operasyon ag multang hasta P50,000 kung ro violator hay sangka authorized seller.
Kaibahan ro SIM Card Registration Bill sa mga priority legislation it Kamara makaron nga 19th Congress.
