KALIBO, Aklan— Gin engganyo it sangka political analyst sa Aklan ro publiko nga usisaon ro gusto nga magiging Barangay ag SK officials sa andang lugar ag tan-awon kon ro mga raya hay matino, mayad, tampad ag masaligan.
Suno kay dating Sangguniang Panlalawigan Member Atty. Harry Sucgang nga dapat nga bukon it corrupt ag nagasukoe sa anomaliya , tampad sa serbisyo ag bukas sa publiko kamana man nga mayad ag may disiplina.
Kinahangean suno kana nga may plataporma para sa ika-umwad it andang barangay, maayos ro relasyon sa mga kabarangay ukon alisto sa pagbulig eabi eon sa tiempo it kalamidad; ag may patas nga pagtan-aw sa nagkaeain-eain nga problema sa barangay ag madaling mapaeapitan sa oras it pagkinahangean.
Kaeabanan suno kana makaron nga tiempo hay nagapa-ilihir eamang sa barangay bangud sa pangkaugalingon nga interes ag ro pagbaton it sweldo.
