KALIBO, Aklan—Ginkumpirma it Aklan Police Provincial Office ukon APPO nga gin-relieve eon halin sa anang pwesto ro sangka pulis sa probinsiya nga gina-alegar nga nagabaton it kwarta halin sa mga indibidwal nga nagapadaeagan it illegal gambling.
Nasayuran nga sambilog imaw sa tatlong Police Non-Commissioned Officer sa Western Visayas nga ginasugid nga eakot sa illegal nga sugae.
Suno kay PSSgt. Leonelyn Artes, tagapaghambae it Aklan PPO dati raya nga naga-duty sa Aklan PPO ag makaron hay presente nga naka-assign sa Regional Personnel and Holding Accounting Unit it Police Regional Office 6 samtang gina-imbestigahan ro anang kaso.
Ginpahayag dugang nga owa anay ginpangaeanan ro eakot nga personnel bangud nga purong alegasyon pa eamang ro ginapasibangud kana.// ro daywang iba pang pulis hay naka-assign sa Bacolod City .
Nauna eon nga ginpahayag ni PRO 6 Regional Director PBGen. Jack Wanky nga sa oras nga mapamatud-an sa imbestigasyon nga guilty sanda sa pagkaeakot sa illegal gambling, posibleng mapasakaan sanda it kasong administratibo ag mapahalin sa serbisyo .
Gindugang pa it opisyal nga engkaso nga may mga chiefs of police sa rehiyon nga owa gina-aksyunan ro nagakatabu nga illegal activities sa andang nasakupan hay igapatuman nana ro “one strike policy” it PNP.
