Ginpaathag ni Department of Social Welfare and Development ukon DSWD region 6 information officer Therese Fely Legaste nga ro Assistance to Individuals in Crisis Situations ukon AICS hay regular nga programa it ahensya nga nagatao it immediate, temporary, ag direct financial ukon material aid para sa medical, burial, food, transportation ag educational sa mga Pilipino nga nagapangatubang it mga uwa ginasaligan nga krisis kaparehas it pagmasakit, namatayan ukon kalamidad.
Bangud kara, regardless sa estado sa kabuhi hay pwede nga makapangayo it bulig-pinansyal ukon bulig-materyal sa ahensya eabi eon makaron nga nagapangatubang ro nasyon sa energy crisis.
Apang, magaagi sigon ro tanan sa proseso ag iga-assess it mga social workers ro indibidwal nga magapaeapit sa andang taeatapan ag pagausisaon kon anu nga bulig ro andang kinahang-ean nga makapahagan-hagan sa andang sitwasyon.
Dugang pa ni Legaste nga bukon eamang it poorest to the poor ukon mga una sa low income families ukon indibidwal ro pwedeng maka-avail sa nasambit nga program kundi ro tanan nga magiging kwalipikado sandig sa andang magiging assessment.
