KALIBO, Aklan—Ginlunsar eon ro rehabilitasyon sa baeay it namatay nga si Cardinal Jaime Sin kon sa siin pagahimuon raya nga museum sa banwa it New Washington.
Ro programa hay ginpangunahan it Serviam Foundation nga raya man ro may custodian sa baeay sa partisipasyon it Diocese of Kalibo sa pagpanguna ni Archbishop Jose Corazon Talaoc, lokal nga gobyerno it New Washington, National Museum of the Philippines ag National Historical Commission of the Philippines.
Madumduman nga nakaangkon it Memorandum of Agreement sa tunga it Diocese it Kalibo ag Serviam Foundation nga ginpirmahan ko Agosto 31, 2023 kadungan it ika-95 anyos nga kaadlawan ni Cardinal Sin sa Manila Cathedral.
Nakapirma sa MOA sanday Msgr. Rolando dela Cruz ag Fr. Rufino Sescon Jr. it Seviam Foundation ag Bishop Jose Corazon Tala-oc it Diocese of Kalibo ag Fr. Justy More it Historical Research, and Cultural Council it Diocese of Kalibo.
Tuyo it diocese sa pagtukod it museum nga ma-preserve ro handumanan ni Cardinal Sin, ag matur-an ro mga masunod nga henerasyon angot sa anang kabuhi ag teachings.
Target it diocese nga ibutang sa museum ro koleksyon it ecclesiastical artifacts ag archival materials.
