KALIBO, Aklan — Nagsumite eon it damage assessment report ro Department of Public Works and Highways (DPWH)-Aklan sa andang regional office ag Bureau of Maintenance angot sa nasamad nga revetment wall sa Brgy. Daja Sur, Banga sa pagpanaeasa it tatlong sunud-sunod nga bagyo .
Suno kay Engr. Joey Ureta, head it maintenance section it DPWH-Aklan nga magahueat pa kara it nagakaigo nga pondo antes nga maumpisahan ro rehabilitasyon sa nasambit nga flood control structure.
Limitado eamang sigon ro andang maintenance fund para sa pag-ayos it mga potholes ag pag-aspalto sa mga samad nga karsadahon.
Agud nga temporaryong maprotektahan ro mga residente maeapit sa lugar, nagpadaea suno kana ro andang taeatapan it mga tawuhan ag dump truck agud nga magbutang it mga tonner bags nga nagatuyo nga mapahagan-hagan ro pagkatiphag it eugta sa bibi it suba nga sa makaron ro kasamaran hay may eapad nga kapin sa 330 linear meter.
Kapin sa P150 milyon ro andang ginpangayo nga pondo para sa rehabilitation and repair it nasambit nga revetment wall, apang bangud nga maeawig ro proseso, indi sigon madali-dali ro pag-ayos kara.
Sa pihak nga parte, gindugang pa ni Engr. Ureta nga padayun ro andang pag-kaayad sa mga nagkaeasamad nga mga daeanon bangud sa nag agi nga mga bagyo.
Tig daywang team eamang sigon ro naga-repair makaron sa eastern ag western section it Aklan bangud sa kawad-an it supisyente nga pondo.
