KALIBO, Aklan—Nagaabot sa P80,000 pesos ro inisyal nga ginatantyang danyos sa nasunog nga restobar sa banwa it Kalibo.
Ro nasambit nga kaean-an nga ginapanag-iyahan ni Ryan Denosta hay human sa light materials kon sa siin kapin sa daywang dag-on pa eamang raya nga nagaoperate sa may bahin it San Lorenzo Drive kat nataeopangdan eon lang raya nga nagadaba-daba ro kaeayo ag madasig nga gin-eamon ro restaurant.
Suno sa nakakita nga si Ben Dalmacio, nagasikyar imaw sa lugar bangud nga mauli kunta sanda sa banwa it Madalag kat nataeopangdan nga may madamoe nga aso nga nagahalin sa restobar rason nga madasig imaw nga nagkaripas sakay sa anang motorsiklo paadto sa taeatapan it Bureau of Fire Protection.
Sa pagresponde it firefighters hay mabahoe eon ro kaeayo bangud nga madasig raya nga nagkalhit sa light materials ag sa iba pang kagamitan nga madasig duktan it kaeayo.
Posible nga may gin-eaha sa kusina nga nalipatan ro kaeayo nga tumapik sa gamit nga madasig duktan it kaeayo.
Ro insidente hay padayon pang ginaimbestigahan it Kalibo Bureau of Fire Protection.
