KALIBO, Aklan—Desidido nga magpailihir bilang kongresista sa ikaywang distrito it Aklan si Retired Lieutenant Matt Wacan para sa nagahilapit nga 2022 national and local elections.
Suno kana, opisyal sigon rayang makumpirma pag-abot it tyempo it filing it Certificate of Candidacy (COC) it mga kandidato nga magapadaeagan sa nagkaeain-eain nga posisyon sa gobyerno sa maabot nga Oktobre.
Sambilog sigon sa nagtueod kana nga magdihon it anang kandidatura hay para makaangkon it boses ro mga pumueoyo eabi eon sa isla it Boracay agud nga mabaeabagan ro ginaduso nga Boracay Island Development Authority (BIDA) Bill sa idaeom it Government-Owned and Controlled Corporation (GOCC).
Kinahang-ean sigon nga mataw-an it bilog nga atensyon ro nasambit nga proposisyon bangud mabahoe ro magiging epekto kara sa paeangitan-an it mga empleyado ag ekonomiya it lokal nga gobyerno it Malay ag gobyerno probinsyal.
Nasayuran nga ginkaakig it maabo nga pumueoyo ro pagpabor ni Aklan 2nd District Congressman Teodorico Haresco sa pagbilog it BIDA sa pagdumaea it GOCC.
Madumduman nga pasado eon sa ikaywang pagbasa it Kamara ro nasambit nga propisisyon sa pihak it hugut nga pagpamalibad it mga lokal nga opisyal, mga ahensiya it gobyerno ag nagkaeain-eain nga grupo sa isla.
Si Wacan hay tumandok it Brgy. Taba-ao sa banwa it Banga ag 27 anyos nga nagserbisyo bilang soldado.
