Nagtuga it halo-halong reaksiyon sa social media ro humanoid robot head nga Origin M1 matapos magpakita it haeos pangtawo ag matuod nga hueag it itsura sa sangka viral nga video.
Ro Origin M1 hay gin-obra it Chinese robotics startup nga AheadForm, nga gintukod ko 2024. Tuyo it kumpanya nga mapaeapit ro interaksiyon it tawo ag robot pinaagi sa mas natural nga facial expressions.
Kaibahan sa mga masarangan nga obrahon it robot hay ro magpamisuk, magkurinot ro dahi, mag-yuhum, magpahueag it mata, ag iba pang ekspresyon it itsura. Sa pihak kara, may pilang netizens nga nagahambae nga makakilibot ro anang itsura bangud sa mabahoe nga pagkahawig sa sangka matuod nga tawo.
Nagagamit ro Origin M1 it 25 hasta 42 nga brushless motors nga nagasirbing artificial muscles agud makontrol ro mga hueag it itsura. May una man raya nga mga camera, mikropono, ag speaker nga nagatau kara it ikasarang nga makakita, makabati, ag makipag-istorya.
Ginaboeobanta nga naga-abot sa masobra sa $150,000 ro haega it pinaka-advanced nga bersiyon it robot.
Sa makaron, demonstration unit pa eamang ro Origin M1 ag ueo eamang ro parte kara. Padayun man ro pag-develop it AheadForm agud nga mapamayad ro paghambae ag paghueag it anang baba kaibahan ro plano nga ikonekta raya sa mga AI language model agud nga mas pa nga maintindihan ro ginahambae, tono, ag intensiyon it mga tawo.
