KALIBO, Aklan—Sa kabilugan nga 1,848 ektarya nga kaeanasan nga sakop it National Irrigation Administration ukon NIA sa western side it probinsiya it Aklan, kapin sa 904 nga kaeanasan ro hatamnan umpisa Hulyo hasta makaron nga buean it Agosto.
Raya ro ginpahayag ni Anthonette Trinidad it engineering and operations section/operations and maintenance unit it NIA Aklan tuga it nabatyagan eon nga epekto it El Niño phenomenon.
Suno kana nga target kunta nanda nga mapatubian ro kapin sa 1,060 ektarya it kaeanasan , apang naga-abot pa eamang raya makaron sa 904.
Raya hay nagakahueugan nga mabahoe nga porsiyento ukon masobra sa 800 nga ektarya ro owa eon natamnan bangud sa pagkabaeaka it pilang mga mangunguma nga sanda hay malugi.
Nauna eon nga ginpahayag it NIA nga sangkiri eon lang ro supply it tubi sa suba it akean nga ginaboe-an it water source it mga banwa it malinao, lezo , makato ag numancia kun sa siin pilang portion it Lezo ag numancia hay apektado eon it kakueangan it tubi halin sa irigasyon.
Sa kamatuoran antes pa man ro cropping ko Hulyo hay nagpaguwa eon it abiso ro NIA sa mga irrigators association nga limitado eon ro supply it tubi kun sa siin gin laygayan nga imbis nga magtanum it paeay hay mag-divert sa mga pananum nga owa nagakinahangean it maabu nga tubi.
Nakipag angot eon man sigon sanda sa iba pang natungdan nga ahensiya it gobyerno agud nga mataw-an it bulig ro mga apektadong mangunguma.
Samtang, ginpahayag pa ni Trinidad nga nagapadayun hasta makaron ro construction it augmentation canal halin sa Sigcay, Banga paagto sa Kinalangay Nuevo, Malinao.
Nasayuran nga ginpahayag it pag asa nga sambilog ro Aklan sa maapektuhan it El Niño nga posibleng maga-grabe hasta sa buean it Oktubre.
