Gin engganyo ni Engr. Jun Agravante, presidente it Federation of Livestock, Hog and Poultry Raisers Association sa Aklan ro mga hog raisers nga indi magpundo sa pag-alaga it baboy bilang pagpahaum sa ginaeauman nga pagtaas it demand makaron nga nagahilapit nga “ber months.”
Kadungan kara, nagapanawagan si Agravante it mas hugut nga pagpatuman it border checkpoints ag biosecurity protocols agud nga malikawan ro pagsueod it African Swine Fever (ASF) sa Aklan.
Suno pa kana nga base sa andang pinaka ulihi nga pakikipagpueong sa Office of the Provincial Veterinarian, ginasugid nga owa pa it aktibo ukon kumpirmadong kaso it ASF sa probinsiya, apang may pilang gina alegar nga nagahana nga maglikaw sa border checkpoints ag naga-agi sa mga alternate route.
Gin engganyo it grupo ro mga LGUs ag barangay nga insigidang i-report ro mga makarondaya nga insidente ag siguraduhon nga nasusunod ro mga protocol sa pagpasueod it baboy.
Ginmitlang man nana ro mga hangkat sa presyo it live hogs ukon buhi nga baboy, nga naka-apekto sa kita it mga raisers. Ginpamilit nana nga kinahangean nga maging patas ro presyo para sa hog raisers, traders ag consumers agud nga magapabilin nga buhi ro industriya.
Dugang pa ni Engr. Agravante nga ro naga eksister nga presyuhanay hay kapin sa P180 hasta P190 per kilo eamang maeayu sa andang ginaduso nga P210 per kilo.
May patakaran sigon ro mga traders nga kon manaba sa 80 kilo ro timbang hay kaeabanan nga ginabawasan raya it P10 kada kilo ro presyo.
Naga abot sigon sa P10,000 ro capital it raisers bago maibaligya ro sangka baboy, rason nga importante ro tamang presyo ag suporta sa industriya.
Gin kumbinyo man nana ro mga raisers nga hugut nga ipatuman ro biosecurity measures ag nagapanawagan sa provincial government nga maghimo it pamaagi kon paalin nga makaangkon it bakuna kontra sa ASF bilang dugang nga proteksyon sa industriya.
