KALIBO, Aklan—Kapin sa napueong porsyento it mga tawo sa bilog nga kalibutan hay may sakit sa bato.
Ginakabig man raya bilang ika-siyam nga rason it pagkamatay sa kalibutan.
Suno kay Dra. Marymil Dignadice, Fellow it Philippine College of Physicians nga naga-abot sa 10,800 ka mga Filipino ro nakaka-eksperyensya it sakit sa bato kada dag-on.
Base sa datus, naga-abot sa 10 hasta 12 porsyento ro insidente it naga-dialysis nga pasyente sa Pilipinas.
Mag-euwas kara, 30 hasta 40 porsyento man ro nakakaangkon it sakit sa bato sa nasyon.
Ro kidney ukon bato ro nagsaea it nagkaeain-eain nga bagay nga nagadaeagan sa sueod it eawas kapareho it dugo, pagkaon ag tubi.
Bangud kara, ro eawas hay nalilimpyuhan ag nabubue-an it mga higko ukon toxin.
Kung indi magampanan it bato it maayos ro obligastyon kara, ro tawag kara hay sakit sa bato ukon chronic kidney disease.
Ro nasambit nga baeatian hay posibleng magresulta sa pagbilog it kidney stones ag edema.
Kung indi raya maagapan, posible rayang mahueog sa kidney failure, sangka kondisyon nga makamaeatay.
Engkaso nga makabatyag it mga sintomas it kidney disease, insigida nga magpa-checkup sa doktor agud nga masayuran ro nagakaigo nga pagbueong sa inyung baeatian.
Samtang, gin-engganyo man Dra. Dignadice ro publiko nga magpartisipar sa andang igapatigayun nga blood letting activity sa maabot nga Hunyo 23 sa bahin it Dr. Rafael S. Tumbukon Memorial Hospital.
Mabahoe sigon raya nga bulig sa mga kidney patient nga nagakinahang-ean it dugo.
