Sambilog patay, daywa ro ninahan matapos aksidenteng bumonggo ro sangka motorsiklo sa kasubeang karang truck takna 8:46 kabi-e sa Linabuan Norte, Kalibo.
Ro namatay nga biktima hay ginkilaea kay George Victoriano Jr. kaibahan ro ninahan karang angkas nga si Ronilo Victoriano ag parehong residente it Mambog, Banga.
Samtang lastro man sa kaeawasan ro naangkon it sambilog pang rider it motorsiklo nga si Jayralph Nacino Reteo, 26 anyos it Fulgencio, Balete.
Base sa inisyal nga imbestigasyon, maghalin sigon ro magmaeanghod sa banwa it Kalibo ag pauli eun kungta sa andang panimaeay kat mahueog sa karsada ro helmet it driver nga si George.
Nagbalikid sigon ro driver, ag owa kara nataeupangdan nga una eun sanda sa linya it kasobeang nga truck nga minamaneho ni Almir Castro Almine, 31 anyos it Poblacion, Altavas, ag paadto kungta sa banwa it Kalibo.
Bangud kara, sumalpok sa truck ro magmaeanghod antes pang bumonggo sa ginamanehong motorsiklo ni Jayralph nga paadto man sa banwa it Banga.
Nakaangkon it nagkaeain eain nga lastro sa kaeawasan ro nasambit nga magmaeanghod ag makarun hay padayun pang naka-confined sa provincial hospital samtang si Jayralph hay gindaea sa sangka pribadong hospital.
Samtang temporaryo man nga gindaea sa Kalibo PNP station ro mga sasakyang naeakot sa aksidente para sa nagakaigo nga disposisyon.
