Kalibo Aklan ——-Sambilog sa 37 nga mga seafarer nga nag-abot sa Aklan ko Miyerkules, Abril 29 ro nagpositibo sa Real-Time Reverse Transcription Polymerase Chain Reaction (RT-PCR) test sa coronavirus disease 2019 (COVID-19).
Sa ginpatigayon nga press conference it Provincial Health Office (PHO)-Aklan, ginpahayag ni Dr. Cornelio Cuatchon, Jr. nga asymptomatic ro nasambit nga seafarer nga naka-isolate makaron sa COVID ward it Aklan Provincial Hospital.
Ro RT-PCR test sigon ro basehan it Department of Health (DOH) para opisyal nga madeklara ro sangka pasyente nga confirmed COVID-19 patient.
Insigidang ginpaidaeum ro nasambit nga mga seafarer sa swab test ag RT-PCR test kat mag-abot sa sangka hotel sa Kalibo para sa 14-day mandatory quarantine nga ginsueang sa Iloilo port, kun sa siin, ginpadaea ro specimen sample sa Western Visayas Medical Center sa Iloilo, sangka sub-national laboratory.
Padayun pa nga ginahueat ro resulta it iba pang Aklanon nga marino.
Tanan sanda hay may mga daeang mga dokumento nga nagapamatuod nga sanda hay nagpaidaeum sa quarantine test ag nag-negatibo man sa rapid test halin sa Manila rason nga ginpasugtan nga maka-uli sa Aklan .
Sa pihak nga parte, fully-recovered eon ro ap-at sa limang kumpirmadong kaso matapos mag-negatibo sa ikaywang repeat test.
Negatibo man ag nagguwa eon makaron nga adlaw sa ospital ro 68 anyos nga retired government employee ag presenteng lay minister sa Kalibo Cathedral nga taga-Barangay Andagao Kalibo, apang kinahangean pa kara nga magpaidaeum sa sambilog pang repeat test.
Nasayuran nga ro Aklan hay ginpaidaeum sa General Community Quarantine halin sa Enhanced Community Quarantine base sa ginpirmahan nga Executive Order No. 023 ni Aklan Governor Florencio Miraflores.
