KALIBO, AKLAN — Padayon nga ginabueong sa Aklan Provincial Hospital ro sangka 29-anyos nga eaeaki matapos nga naiguan sa pagpamaril it sangka barangay kagawad sa sangka namatyan sa Brgy. Loctuga, Libacao.
Nakaangkon it lastro sa tuo nga pa-a ro biktimang si Julie Orbista samtang ro ginaturong suspek hay nakilaea kay Lito Villorente, sangka barangay kagawad it nasambitang lugar.
Nauna eon sigon kara nga nagasugae ro suspek kaibahan si Argie Esto, nagapang-edaron it 30-anyos kon sa siin nakaangkon it diskusyon sa tunga it magtimbang nga parte hasta sa nag-abot sa punto nga naggabot it baril ro brgy. kagawad.
Bangud kara, insigidang nagpanago sa likod it biktima si Esto butang nga uwa raya naiguan.
Ginpahayag dugang nga maabong beses sigon nakabati it pag-eopok it baril si Orbista apang sangka bala eamang sigon ro tumama kana.
Nasayuran nga una sa impluwensya it makahieilong nga ilimnon ro nasambitang mga indibidwal.
