KALIBO, Aklan—Arestado ro sangka 43-anyos nga babaye matapos ro ginpatigayun nga drug buy bust operation sa Ceres Bus Terminal sa Brgy. Estancia, Kalibo.
Nakilaea ro suspek nga si Rodelia Ventura, residente it Brgy. New Buswang sa nasambit nga banwa.
Si Ventura hay naaresto pinaagi sa gintingub nga pwersa it Provincial Drug Enforcement Unit ukon PDEU-Aklan, Philippine Drug Enforcement Agency (PDEA) ag Kalibo Municipal Police Station.
Nabuoe sa gintabo nga bagahe ni Ventura ro pitong bulto it ginapatihan nga shabu kabaylo it P7,000 nga marked money.
Suno kay Police Lieutenant Colonel Frenzy Andrade it PDEU-Aklan nga nakasueod ro mga iligal nga droga sa medyas it bagahe nga ginpadaea sa suspek halin sa Metro Manila.
Ginapahayag nga mabuhay eon nanda nga ginamonitor si Ventura.
Mag-eowas sa iligal nga droga, may nakita pa nga pilang kagamitan sa sueod it nasambit nga bagahe.
Ginabuebanta nga naga-abot sa P300,000 ro street value it mga narekober nga droga.
Sa pihak nga parte, maidid nga ginpamalibaran it suspek nga natueopangdan kara ro iligal nga droga sa sueod it bagahe.
Pagdepensa pa it suspek nga paga-tabuon eamang kunta nana ro bagahe.
Si Ventura hay presenteng nakakulong sa Kalibo Municipal Police Station ag posibleng magpangatubang sa nagakaigo nga kaso.
