KALIBO, Aklan–Makabig nga ‘overwhelming’ it sangka Aklanon lawyer ro pagpili kana bilang bag-ong Director General it Komisyon ng Wikang Filipino.
Suno kay Atty. Marites Barrios Tan nga raya hay may pitong dag-on nga termino ag kinahang-ean nga pumasa sa rekisito it Civil Service Commission (CSC).
Kaibahan sa anang mandato ro pagpa-eapnaag, pagpreserba ag pagpaumwad pa it paggamit sa Wiking Filipino ag iba pang lenggwahe sa nasyon.
Pila sa mga pagatutukan nana nga programa hay ro pagpasanyog it paggamit it mother tongue, paggamit it Filipino sign language kamana man ro maeapnagon nga pagbaton ag paggamit it wikang Filipino.
Ro Komisyon ng Wiking Filipino hay gintukod pinaagi sa Republic Act (RA) 7104 sa idaeom it pagdumaea it Office of the President.
Si Atty. Tan hay tumandok it banwang Malinao ag una eon nga naging practicing lawyer.
Nagtrabaho man imaw bilang University Secretary sa Pamantasan ng Lungsod ng Maynila; Legal Officer ag Accountant sa City Hall of Manila; University Legal Council ag University Secretary it University of the Philippines (UP) Manila antes naadto sa House of Representatives bilang Director II sa opisina ni Deputy Speaker Jose Atienza Jr.
