KALIBO, Aklan – Nag-uli it silver medal sa 2024 International Mathematics Challenge si Ma. Reesablle Retamar Roldan nga ginpatigayon sa Bocor, Indonesia ku Hunyo 22.
Sa pakikipag-angot it Bombo Radyo kanday Cesar Briones Roldan Jr ag Michelle Retamar Roldan, mga ginikanan ni Reesablle makabig nga milestone ro kadaeagan it andang unga.
Pagsaysay nanda nga ku umpisa hay uwa masyado nahilig sa numbers ukon sa mathematics ro andang unga antes raya hay nagtungtong it Grade 2, kato sigon naging paborito it andang unga ro nasambitan nga subject, ag ginsuoed man sigon imaw sa Mathematics Trainers Guild.
Bangud kara, nagdesisyon ro daywa nga bue-an it tutor ro andang unga agud nga matutukan imaw sa nasambitan nga subject.
Apisar nga Overseas Filipino Worker ro anang ama ag working mom ro anang ina ginatinguhaan it daywa nga tatapon ag itao ro tanan nga kinahang-eanon it unga.
Pagsugid ni Michelle nga halin pa sigon sa ibang nasyon ro anang asawa ag inoras eamang ro naging pagitan antes nga sandang tatlo hay nagbyahe sa Indonesia agud nga suportahan ro andang unga.
Antes ro kompetisyon sa Indonesia, hay nag’adto anay sa Tagaygay si Michelle ag Reesballe kun siin nakakuhit man anay imaw it award.
Pagpakigbahin it daywa nga mabuhay nanda nga ginhueat ro andang unga ag suno kanda preparahan nanda ro anang paeaabuton bangud raya eamang ro andang maitao sa andang unga.
Masayuran nga 40 Pinoy delegates ro nag-adto sa Indonesia, kun siin naging kontra nanda ro halin sa mga nasyon nga Thailand, Singapore, Vietnam ag maabong iba pa.
Nagpanguna man ro Pilipinas kun siin may una nga, 7 nga merit awards certificates, 12 nga bronze, 11 silver ag 2 daywang golds.
