KALIBO, Aklan—Ginaboeobanta nga naga-abot sa P1.6 milyon pesos ro kahalitan nga gintuga sa pagkasunog it sangka baeay sa Sitio Tigao, Brgy. Calangcang, Makato kahapon it hapon.
Ro baeay nga himo sa mixed materials hay ginapanag-iyahan it mag-asawang Emir ag Trudesminda Villanosa.
Suno kay SFO1 John Henry Ildesa, fire investigator it Bureau of Fire Protection (BFP) Makato nga bandang alas-3:29 it hapon kat makabaton sanda it impormasyon nga may sunog nga nagakatabu sa nasambit nga lugar.
Insigida sigon sanda nga nag responde ag nagpatigayon it fire fighting bangud sa sugid it mga kaeapitbaeay nga posibleng may na-trap sa sunog, kun sa siin sambilog sa mag-asawa hay sangka PWD.
Apang sa pag-usisa hay owa it tawo ro baeay kat matabu ro insidente.
Madasig nga na-control ro kaeayo ag gindeklara ro fire out bandang alas- 4:02 it hapon.
Maskin nga madasig nga natapna ro kaeayo, owa it naeowas nga mga gamit bangud nga ro misis hay presenteng sa tindahan nagabaligya it isda ag ro anang mister hay sa andang farm.
Gina-imbestigahan pa it BFP ro rason it sunog.
Owa man it napabalitang naninahan ukon namatay sa insidente.
