KALIBO, Aklan—Una eon sa mayad nga kahimtangan ro sangka bag-ong tawo nga eapsag nga eaeaki nga nakit-an sa dating taeamnan it simuyaw sa Sitio Guba, Brgy. Tigayon, Kalibo kaina pasado alas-6 ro agahon.
Suno sa Kalibo Municipal Police Station, nakit-an sigon it sangka mangunguma nga nakilaea kay certain rudy nga maga-gihit kunta it anang baka ro eapsag sa nasambit nga lugar sa idaeum it tanum nga eabnog.
Naagyan ag napan-uhan sigon kara ro sangka itom nga bag nga nagahinueag ag may nagatangis nga eapsag rason nga anang gin agtunan.
Nakibot imaw kat makita ro eapsag nga nakaputos it jacket.
Ginasugid nga bag-ong tawo ro eapsag kat gin abandona bangud nga may nakahigot pa nga bigkis sa anang pusod.
Insigidang gindaea sa provincial hospital ro eapsag agud nga mausisa sa bulig it kapulisan.
Suno kay Jomer Retiro, residente sa lugar ag sambilog sa mga nagbulig sa eapsag nga imaw mismo ro nagbukad sa eagsag ag naglimpyo sa anang ilong agud nga makaginhawa.
Panawagan kara sa nag abandona sa eapsag nga kabay nga makonsensiya sa andang gin obra.
Igatugyan sa pagdumaea it Municipal Social Welfare and Development Office it kalibo ro nasambit nga eapsag.
Nagapadayun man ro imbestigasyon it kapulisan agud nga matumod kon sin-o ro ina nga nag-abandona sa eapsag.
Samtang, ginsaysay man ni Recelle Meren, sambilog man nga nagbulig sa eapsag nga maabu kanda ro naging emosyunal bangud sa kahimtangan it eapsag.
Maskin sigon ro nagresponde nga si police officer Hilario nga may eapsag man nga ginapasuso hay nag-boluntaryo nga ipa-breastfeed ro nakit-an nga eapsag nga halatang gutom ag gina-eamig.
