KALIBO, Aklan—Pabor si Atty. Plaridel Morania, sangka batikang abogado sa Aklan nga uman nga i-review it kongreso ro Oil Deregulation Law matapos ro sunud-sunod nga pagtaas it presyo it produktong petrolyo.
Ginpaathag ni Atty. Morania nga ro Oil Deregulation Law hay ginpatuman ko tiempo ni dating Pangueong Ramos nga kon sa siin ginduea ro kontrol it gobyerno pag-abot sa presyuhanay it petrolyo it mga kompanya it langis.
Dati suno kana hay pwedeng diktahan it gobyerno ro mga kompaniya it langis nga indi anay magpataas it presyo para sa kamaeayran it publiko.
Apang makaron hay owa sigon it mahimo ro gobyerno kon ginahambae it mga oil companies nga magapatuman sanda it oil price hike.
Nauna kara, gin hinyu ni pangueong duterte sa kongreso nga uman nga tun-an ro nasambit nga laye kon nakakabuilig pa sa mga pumueuyu partikular sa mga motorista.
Gindugang pa ni Atty. Morania nga may domino effect kon ro presyo it langis ro nagataas partikular sa mga nagapangunang baeak-on.
May disbentaha sigon sa gobyerno engkaso nga ibasura ukon bawasan ro excise tax it langis bangud nga mabuhinan man ro andang kita apang mabahoe nga bulig sa mga pumueuyu.
