KALIBO, Aklan–Nagapanawagan ro tag-ana it sangka brand new nga motorsiklo matapos nga gintakaw it owa pa makilaeang persona bandang alas-4:15 it aga-aga kahapon sa Brgy. Estancia, Kalibo.
Suno kay Jun Quimpo, 28-anyos nga samtang nagakape imaw bandang alas-5:00 it agahon ko Dominggo hay napan-uhan eon lang kara nga owa eon ro anang motorsiklo nga nakaparking sa sueod it andang compound.
Gilayon sigon imaw nga nagpa-blotter sa Kalibo Municipal Police Station kamana man nga gin-review ro buoe it CCTV.
Dikara sigon makit-an ro pagbuoe it owa pa makilaeang suspek nga nakasuksok it kaeo, may tattoo sa waea nga alima, nakasuksok it kulay itom nga short ag puti nga tsinelas.
Suno kay Quimpo nga base sa hueag it suspek makit-an nga planado kara ro pagpanakaw.
Aminado man imaw nga naaywan nana ro yabe sa motorsiklo bangud kampante imaw nga indi raya maduea sa andang compound.
Nag-apela man raya sa publiko nga insigidang ireport sa pinakamaeapit nga estasyon it pulis engkaso nga makit-an ro anang kulay itom nga TMX nga motorsiklo nga may inagyan pa it gin-weldingan bangud nakataeana kunta nana raya nga pagabutangan it side car.
