Bangud sa inde mahagilap it sangka ginang ro broadcaster nga nag-utang kana it mabahoe nga kantidad, ginpakamayad nana raya nga ireklamo sa Kalibo Municipal Police Station.
Suno sa tagreklamo nga si Remia Salvador, 45-anyos it Brgy. New Buswang, Kalibo, tuyo nana sa pagpablotter sa taeatapan it pulisya hay para atubadngon imaw ni Carlo Asturias.
Una kara, naghinyo si Asturias kana nga maghueam it kwarta para pambayad sa hospital bill it anang onga nga ginconfine para makaguwa eon raya.
Bangud sa kaeooy nga uwa it igapahueam nga kwarta, ginprenda it ginang ro anang alahas ag gintaw-an si Asturias it P15,000 sa pagpati nga igabalik man eagi raya it broadcaster kamana man mabahoe ro anang respeto ag pagsalig kana.
Apang, ko ulihi nga ginasukot eon imaw hay maabo ro anang alibay hasta nga uwa eon raya nagpakita kana.
Ro insidente hay nagtuga it mabahoe nga problema ag stress sa tagreklamo bangud nga pilang gabie eon imaw nga uwa it tueog sa kahadlok nga maremata ro anang alahas matapos nga nakabaton imaw it notice nga due date eon nana.
