KALIBO, Aklan—Arestado ro sangka cellphone technician matapos nga madakpan sa pagbaligya it iligal nga droga sa pwesto it ukay-ukay nga negosyo it anang misis, bandang alas-11:42 sabado it agahon sa Roxas Ave. Extension Brgy. Andagao, Kalibo.
Raya hay matapos ro ginpatigayon nga anti-illegal drug bust operation it Provincial Drug Enforcement Unit ukon PDEU-aklan ag Kalibo Municipal Police Station.
Ginkilaea ni P/Lt. Col. Frenzy Andrade, head it PDEU aklan ro suspek nga si Jacob Solano y Dadang, 41 anyos, tubong banga ag presenteng naga-istar sa Mercedez Village, Brgy. New Buswang, Kalibo.
Sa inisyal nga imbestigasyon, nakabaton sigon it intelligence report ro PDEU nga si Solano hay nagabaligya it ginadudahan nga shabu nga ginagamit nga prente ro anang ukay-ukay nga puwesto sa nasambit nga lugar.
Insigidang nagpatigayon it illegal drug bust ro PDEU ag nakipag-angot sa Kalibo PNP kun sa siin hay naaresto ro suspek.
Nabo-oe halin sa suspek ro an-um tanan nga mga plastic sachet nga may sueod nga shabu.
Tatlo sa mga raya hay nabakae sa balor nga 6,000 pesos ag ro tatlong iba pa hay nabo-oe sa ginatigayon nga paghaeughog sa anang bag nga kulay itom.
Narekober dugang sa bag ro sangka kalibre 22 nga baril nga kargado it limang bala, pito pang bala ag marked money nga gingamit sa buy-bust.
Aminado ro suspek nga nagagamit it iligal nga droga apang kat high school pa sigon imaw.
Nagpundo suno kana imaw sa anang bisyo matapos nga mailihir si pangueong Rodrigo Duterte.
Hugut man nana nga ginpamalibaran nga imaw ro nagapanag-iya sa mga narekober nga shabu ag baril ag gin-insister nga puro planted ro mga raya.
Presenteng nakakulong ro suspek sa lock-up cell it kalibo PNP.
Suno kay Atty. Flosemer Chris Gonzales it Aklan Provincial Prosecutors Office, posibleng magapangatubang sa reklamong pag-eabag sa RA 9165 ukon anti-illegal drug act ag RA 10591 ukon comprehensive law on firearms and ammunition si Solano.
Igabiyahe man imaw sa siyudad it Iloilo sa regional crime laboratory para sa drug test kaibahan ro anang mga narekober nga items.
Kasunod it alegasyon nga planted ro mga narekober nga items, ginpahayag ni atty Gonzales nga pagataw-an it due process ro suspek.
