KALIBO, Aklan—Arestado ro sangka eaeaki matapos nga ireklamo it pagpanutok it baril sa Brgy. Old Buswang, Kalibo.
Ginkilaea ro suspek nga si Edito Nadate y Sapico, 58-anyos ag residente it nasambit nga lugar.
Base sa report, nagreklamo sa taeatapan it pulisya si Jimmy Ortega, 64-anyos ag residente it Brgy. Calacabian, Libacao matapos nga nakaangkon it lastro sa baba kat gin-eampusan raya it puno it baril ni Sapico.
Bangud kara, insigidang nagresponde ro mga otoridad ag nabueo sa posisyon ag kontrol ni Sapico ro sangka 38 revolver nga loaded it bala ag uwa it mga nagakaigong dokumento.
Si Sapico hay gilayon man nga ginbitbit sa Kalibo PNP Station ag nakataeana nga magapangatubang sa kasong pag-eabag sa Republic Act 10591 in relation sa Batas Pambansa 881 ukon Comelec Gun Ban.
Angot kara, ginpahayag ni P/Major Willian Aguirre, head it Provincial Intelligence Unit it Aklan Police Provincial Office ukon APPO sa makaron hay naga abot eon sa daywa ro naaresto sa ginpatuman nga COMELEC gun ban sa Aklan.
Nauna kara, taga-banwa it Makato ro unang nadakpan it makamaeatay nga armas partikular ro baril.
Ginpromisa man kara nga mas pa nanda nga pagapabaskugon ro security operations ag implementasyon it gun ban sa probinsiya para sa malinong ag maayos nga eleksyon sa Mayo 9, 2022.
