KALIBO, Aklan—Magapangatubang sa kasong pag-eabag sa Republic Act 10591 ukon Comprehensive Law of Firearms and Ammunition ro sangka eaeaki matapos nga maboe-an it armas ag granada sa anda mismong panimaeay sa Brgy. Apparicio, Ibajay.
Ginkilaea it Ibajay PNP ro suspek nga si Pepito Italia Jr., 44-anyos ag residente it nasambit nga lugar.
Nabueo sa anang posisyon ag kontrol ro sangka kalibre 45 nga baril nga may magazine ag loaded it pitong ka bala.
Sa paghaeoghog it pulisya, narekober dugang ro sangka magazine it kalibre 45 nga may limang ka bala, tatlong ka bala ag sangka granada.
Ginserbehan it search warrant si Italia kasunod it reklamo it anang kasimaryo nga nagapinaeopok raya it baril kon mahilong.
Ro nasambit nga suspek hay insigidang gindaea sa Ibajay Police Station it mga otoridad kon sa siin imaw sa makaron temporaryong nakakustudiya para sa nagakaigong disposisyon.
