Una eon sa maayos nga kondisyon ro sangka eaeaki matapos nga gin-eabo sa Brgy. Venturanza, Banga ko dominggo it aga-aga.
Nakaangkon it minor injury sa sag-ang ro biktimang si Jaypee Dalida ag sa legal nga edad matapos nga ginsaka ro andang baeay nga ginaistaran it uwa makilaea nga suspetsado.
Suno kana, napan-uhan nana nga napaeong ro iwag nga andang ginapatinti rason nga insigida imaw nga nagflashlight ag dikara eon nana nakit-an nga ginaeabo imaw it eaeaki nga may tabon nga eabong ro ueo ag uyahon.
Naalerto sigon raya ag gilayon nga gin-agaw ro sanduko sa suspek kadungan man sa pagsirit kara paguwa it baeay ag madasig nga nagpaeagyo.
Maswerte eamang suno kana ag uwa naigo ro anang daywang dag-on nga onga nga kahulid sa pagkatueog.
Samtang sa pihak nga parte, ginapatihan ni Ricky Dalida, tiyo it biktima nga imaw ro tuyo it suspek apang sa nasambit nga oras hay idto imaw nagkatueog sa anang payag nga medyo may kaeayuon ro antad sa andang baeay.
May ginatumod eon sigon imaw nga suspek sa insidente apang inde pa nana raya mapamatud-an sa makaron bangud nga padayon pa nana nga ginaobserbahan ro hueag it ginaturo nga suspek.
Ko una sigon hay umabot sanda kara sa barangay bangud sa anang alaga nga mga sapat apang uwa eon sigon kana ro natabo ngato bangud nga nakataliwan eon it mabuhay nga panyempo ag sang beses malang natabo.
