Ginkumpirma it Kalibo Municipal Police Station (MPS) nga natural nga kamatayon ro una nga resulta it imbestigasyon sa pagkakita it patay nga eawas it isaea ka eaeaki sa sueod it anang boarding house sa L. Barrios St., Kalibo.
Suno kay PLt.Col. Jerick Vargas, hepe it Kalibo MPS, nabaton it andang opisina ro impormasyon bandang alas-10:55 it agahon angot sa isaea ka tawo nga ginapatihan nga patay sa sueod it isaea ka kwarto sa boarding house.
Sa nakabaton it report, nagdiretso dayon ro mga imbestigador sa lugar ag ginkumpirmar nga ro eaeaki hay nagaeubog sa eugban ag sa tunga it advanced state of decomposition.
Ginpatawag man ro Scene of the Crime Operatives (SOCO) agud mausisa ro crime scene. Sa inisyal nga imbestigasyon, nakit-an ro mga reseta it bueong para sa allergy, diabetes ag sakit sa kidney.
Suno kana, uwa it ebidensya nga nagapakita nga may foul play ukon krimen nga natabo.
Nakilaea ro persona bilang si Darren Bolivar, 23 anyos, residente it Taghalas, New Washington, apang naga-board sa Kalibo bangud nagatrabaho sa isaea ka fast food chain.
Base sa imbestigasyon, ulihing nakita nga buhi ro biktima gab-i it Hulyo 12. Nadiskubre ro anang eawas matapos mag-adto ro anang kaibahan sa trabaho sa boarding house bangud pila eon ka adlaw eon nga indi imaw makontak ag kinahangean iato ro anang uniporme.Bangud naka-kandado ro kwarto, gintan-aw anay ro sueod paagi sa maisot nga gabot antes gin-abrihan ro pwertahan.
Suno pa kay Vargas, ginpaathag it doktor sa pamilya nga posible nga komplikasyon it sakit sa kidney ro naging nagapangunang rason it kamatayon, may kaangtanan man sa anang diabetes. Uwa man it gintao nga pahayag ro pamilya sa resulta it post-mortem examination ag uwa eon sanda nagapangayo it dugang nga medico-legal examination.
Nagpanawagan man ro Kalibo MPS sa publiko nga likawan ro pagpaeapta it uwa nakumpirmar nga impormasyon agud indi makapahadlok sa komunidad.
Ginpamilit ni Vargas nga base sa inisyal nga imbestigasyon, natural death ro kaso ag uwa it may kaangtanan sa bisan ano nga krimen.
Ginpahanumdoman man it opisyal ro mga pamilya nga pirmi kumustahon ro andang mga mahae sa kabuhi, eabi eon kon nagaestar nga isaeahaanon ukon naga-board, agud madali matabangan kon may ginabatyag nga sakit ag malikawan ro pareho nga insidente.
