KALIBO, Aklan—Uwa eon it kabuhi kat nasapwan ro sangka senior citizen sa may binit it baybayon nga sakop it Brgy. Cawayan sa banwa it New Washington.
Nauna eon nga nakabaton it impormasyon ro Municipal Disaster Risk Reduction Management Office ukon MDRRMO New Washington maghalin sa mga residente sa lugar nga may nakit-an ro mga raya nga eawas it tawo nga nagahamyangon ag uwa eon it alintro.
Sa pagresponde it mga emergency personnel hay gilayon sanda nga nagpatigayon it Cardiopulmonary resuscitation ukon CPR sa eaeaki apang uwa it response maghalin sa biktima.
Gindaea nanda raya sa provincial hospital sa banwa it Kalibo apang gindeklara nga patay eon it attending physician.
Sa makaron hay ginatumod pa kon pagkaeomos ro gintunaan it hinali nga kamatayon it nasambit nga senior citizen.
