KALIBO, Aklan—Namatay samtang ginabueong bandang alas-3:00 kaina it hapon ro sangka eaeaki nga gindaea it mga katapo it Kalibo PNP sa Aklan Provincial Hospital.
Ginabuebanta nga naga-edad it 50 hasta 60 anyos ro nasambit nga eaeaki.
Base sa inisyal nga impormasyon, gindaea it mga nagapatrolyang kapulisan ro owa pa makilaeang persona sa ospital matapos nanda rayang makita nga natumba sa ginasakyan nga bisekleta sa bahin it Capitol Site kainang aga-aga.
Posible sigon nga inatake it gina-angkon kara nga baeatian ro biktima rason nga imaw hay natumba.
Ro nasambit nga eaeaki hay nakasuksok it kulay dark green nga sando, naka-jogging pants kamana man nga may tattoo nga sword sa tuo nga porsyon it abaga ag star sa waea nga abaga.
May nakita pa nga kwartang nagabalor it kapin sa P920 sa buesa it jogging pants it biktima.
Hasta sa makaron hay owa pa masayuran ro identity kara ag owa pa it naga-claim nga pamilya.
