KALIBO, Aklan—Nagapati si Barangay Kapitan Elynel Gallardo it Barangay Calimbajan, Makato nga may maeain nga plano kana ukon sa anang bilog nga pamilya ro sangka eaeaking naaresto it mga katapo it Makato PNP matapos nga maireport nga nagapinani-id sa likod it panimaeay nanday kapitana mga bandang alas-12 it aga-aga ko Enero 9.
Suno kay Kapitan Gallardo nga samtang masako ro anang bilog nga pamilya sa pagpreparar it andang handa para sa selebrasyon it Santo Niňo de Makato hay gulpi eamang nga nasipeatan it anang unga ro suspek nga si Harry Taborda-Taladtad 27 anyos ag residente it Barangay Tina, Makato samtang naga aligid-aligid sa andang panimaeay.
Bangud kara hay naalarma sigon sanda ag gilayon nga nagpangayo it police assistance sa Makato PNP.
Dikato man ag naaktuhan it mga otoridad ro suspek sa nasambitan nga lugar.
Sa andang pag-usisa, narecover sa posisyon it suspek ro sangka improvised 12 gauge shotgun ukon pugakhang ag tatlong ka mga bala kamana man ro sangka karit.
Depensa sigon it suspek nga nagapanilong eamang raya sa likod it panimaeay ni Kapitan.
Samtang desisido man si Kapitan Gallardo nga magpasaka it kaso kontra sa suspek.
Nasayuran nga posibleng magapangatubang man ro suspek sa kasong pageabag sa Batas Pambansa numero 881 ukon Comelec gun ban nga nag-umpisa kahapon nga adlaw.
