KALIBO, Aklan—Magapangatubang sa patong-patong nga kaso ro sangka eaeaki nga nagpakilaeang miyembro it Armed Forces of the Philipines matapos nga ma-imbolbar sa sangka aksidente sa banwa it Makato.
Suno kay Police Lieutenant Merriefin Carisusa, hepe it Makato Municipal Police Station nga gin-aresto nanda si Ricky Barrientos, residente it Brgy. Colong-colong, Ibajay matapos kara nga sunggaban ro pribadong behikulo nga ginamaneho it sangka aviation officer kamana man nga iligal nga nagsuksok it uniporme it pulis ag nagdaea it kutsilyo nga klarong pag-eabag sa Resolution No. 10728 it Comelec.
Kat gin-usuyan sigon it driver’s license si Barrientos hay sangka ID it Philippine Army bilang enlisted personnel ro anang ginpakita apang natukiban nga expired eon ko 2019.
Nadugangan pa sigon ro pagduda it mga otoridad bangud nakasuksok raya it pang ibabaw nga uniporme it pulis.
Matapos ro pilang pagpangusisa, insigida imaw nga gindaea sa taeatapan it pulisya ag sa pagrekisa it Makato PNP narekober sa anang mga kagamitan ro sangka kutsilyo.
Si Barrientos hay magapangatubang sa tatlong ka mga kaso nga ginakaeakipan it Reckless Imprudence Resulting in Damage to Property, pag-eabag sa Resolution No. 10728 it Comelec ag illegal use of uniform.
