KALIBO, Aklan—Plano it pamilya retiro nga magpasaka it nagakaigo nga kaso kontra sa nag-eabu sa miyembro it andang pamilya pasado alas-8 kabi-e sa barangay mataphao sa banwa it new Washington.
Suno kay Almira Retiro, unga it biktimang si Antonio Retiro nga nagapahaum eon kunta sanda nga magkatueog kat gulping nagpang-gubat ro andang kasimaryo nga si Dante Baroquillo nga armado it sanduko.
Kat maeapit eon sigon ro suspek sa andang baeay hay nagbo-oe man it sanduko ag tubo ro anang ama bilang depensa, apang naunahan raya it suspek ag natigayon nga maeabu it ap-at nga beses partikular sa anang dughan , butkon ag mga tudlo.
Insigidang gindaea it anang pamilya si Retiro sa ospital nga una eon sa establi nga kundisyon samtang ro suspek hay naaresto it mga rumespondeng pulis nga presenteng nakakulong sa lock-up cell it New Washington Municipal Police Station.
Nasayuran nga ro suspek ag biktima hay parehong sa impluwensiya it aeak.
Samtang, ginapatihan nga nagpang-gubat ro suspek matapos nga gina-alegar nga imaw ro ginapasibangdan nga nag-eabu sa alaga nga baka it manghud it biktima nga si Rene Retiro may sang domingo eon ro nagtaliwan.
Ginpahayag man ni Kagawad Teresita Ordines, igmanghud it biktimang si Antonio nga tuyo it andang pagpasaka it kaso nga mataw-an it hustisya ro pag-eabu sa anang manghud kamana man nga matur-an raya it leksyon.
Opisyo sigon it suspek nga kon mahilong hay nagamaoy ag nagapang-ayat it inaway sa anang mga kasimaryo.
