KALIBO, Aklan—Dead on arrival sa Aklan Provincial Hospital ro sangka electrician matapos nga mabungguan it sangka pick up nga saeakyan ro anang ginamaneho nga tricycle bandang 7:50 kabie sa national highway nga sakop it Barangay Mabilo, Kalibo.
Ro biktima hay ginkilaea kay Cris Herradura, 31-anyos, ag residente it sitio malogo , barangay poblacion sa banwa it new Washington.
Sakay kara ro anang asawa nga sangka kahira sa sangka establisimento komersiyal ag gina-alegar nga sang buean nga nabdos nga si Mary Joy Ruiz Herradura kat matabu ro aksidente.
Samtang, ro suspek hay ginkilaea man kay Aladin vipinosa, 46 anyos , tumadok it brgy. bayot, Roxas City, capiz apang presenteng naga-istar sa Barangay Tigayon, Kalibo.
Base sa record, ro anang ginamaneho nga kulay orange nga pick-up nga may plate number MAC-8573 hay naka-rehistro kay benedicto peralta jr. it barangay cogon, malay.
Sa ginpatigayon nga imbestigasyon, una sa impluwensiya it makahiielong nga ilimnon ro driver it ford ranger nga si vipinosa kat natabo ro aksidente kun sa siin eumapaw raya sa anang linya ag natigayon nga mabungguan ro ginamanehong tricycle it biktima nga nagapa-uli eon kunta.
Masuwerte man nga nakaeumpat ro 31-anyos nga misis ag sa makarun hay padayun pang naka-confined sa sangka pribadong hospital sa banwa it Kalibo.
Samtang si Cris hay binawian gid it anang hueam nga kinabuhi matapos nga makaangkon it fatal nga lastro sa kaeawasan partikular sa anang ueo.
Sa pihak nga parte, ginpahayag ni prexy herradura, ama it biktima nga grabe ro pagpangayo it pasaylo it driver sa natabu.
Nag-atubang eon ro magtimbang nga parte sa kalibo PNP, apang pursigido ro pamilya nga iduso ro kasong reckless imprudence resulting to homicide, physical injury and damage to property.
Ro mag-asawa hay may an-um nga buean nga eapsag.
