Sangka empleyado it ospital ninahan matapos nga maaksidente

KALIBO, Aklan—Ninahan ro sangka empleyado it ospital matapos nga maaksidente sa ginamanehong motorsiklo sa national highway nga sakop it Brgy. Laguinbanua East, Numancia.

Ginkilaea ro driver nga si Jilian Maries Manuel, 24-anyos ag residente it Brgy. Marianos sa nasambit nga banwa.

Base sa report, halin sa anang duty ro biktima kat pag-abot kara sa nasambit nga lugar hay may nagahinampang nga ayam kon siin sambilog sa mga raya hay nagtabok rason nga ana raya nga nasunggaban.

Bangud sa impact it anang pagkasunggab, natumba ro biktima nga nagresulta man sa anang pag-angkon it gasgas sa nagkaeain-eain nga parte it eawas.

Insigida man nga nadaea sa ospital nga anang ginatrabahuan si Manuel para sa anang nagakaigong pagbueong.