KALIBO, Aklan–Kapin sa P8,000 ro natigayun nga mabuoe it sangka miyembro it salisi sa sangka establisyemento komersyal sa banwa it Kalibo ko Abril 18.
Raya hay matapos nga ginpabayluhan it owa pa makilaeang suspek ro anang P18,000 nga kwarta it small bill.
Suno kay Irene Mariano, store manager it natungdan nga establisyemento nga makit-an sa andang CCTV footage nga unang nag-adto sa counter 8 ro suspek antes nga nagsaylo sa last counter.
Dikara sigon ginbaton it cashier ro P18,000 para bayluhan it 36 bilog nga tig-P500.
Makataliwan ro pilang minuto hay uman nga nagdemand ro suspek nga pabayluhan raya it tig P100 apang nagpamalibad eon ro cashier rason nga ginbalik kara ro tig P500 nga naka-fold.
Inisigida sigon nga ginbalik it kahera ro kwarta sa suspek kamana man nga owa eon ginhuyap pa ro gindawat kana nga kantidad.
Ulihi eon sigon nanda natueopangdan nga kueang ro andang kwarta kung siin sa pagsikyar sa CCTV makit-an ro madasig nga pagsueod it suspek it katunga it tig P500 sa anang daea nga bag.
Bangud kara, nagdesidir sigon sanda nga magpa-blotter sa Kalibo Municipal Police Station.
Raya sigon ro unang kahigayunan nga nabiktima ro andang establisyemento it miyembro it salisi.
Sa makaron hay nagapabilin pa sanda nga blangko sa pagkatawo it suspek apang nakasuksok sigon raya it maong nga short, naka-t-shirt it light blue ag naka-face mask sa pagsueod sa andang establisyemento.
