KALIBO, Aklan—Sangka fetus ro nasapwan sa ginakutkot nga poste it tangkae kahapon it agahon sa bahin it Brgy. Baybay, Makato.
Suno kay Roger Barios, laborer sa nasambit nga lugar nga nakita nana ro fetus samtang nagakutkot it eugta nga pagapatindugan it poste it paga-ubrahon nanda nga tangkae.
Insigida sigon nana nga gintawag ro anang amo para ipasayod ro hitabo.
Gilayon sigon nanda raya nga ginlimpyuhan ag dikato eon nakumpirma nga sangka fetus nga eaeaki ro anang nasapwan.
Ginasugid nga puno pa it eapok ro fetus kat raya hay madiskubrehan matapos nga gin-eubong sa eugta.
Samtang, owa man sigon sanda it napan-uhan nga nag-aywan kara sa lugar.
Sa pihak nga parte, ginpaathag ni Punong barangay Ramil Pelayo it Brgy. Baybay, Makato nga raya ro kauna-unahan nga kahigayunan nga may nasapwan nga fetus sa andang lugar.
Ginabuebanta nga naga-edad it an-om hasta pitong buean pa eamang ro nasambit nga fetus.
May haba sigon raya nga 5 to 6 inches ag maisot pang mayad.
Dugang pa it opisyal nga bukon pa it fully developed ro fetus ag kueang pa sa buean.
Posible sigon nga kahapon it aga-aga gintawo ro fetus.
Sa pag-usisa nana sa barangay, owa man sigon it nabdos nga maeapit sa lugar rason nga paealigban pa kung sin-o ro nag-abandona kara.
Insigida man sigon sanda nga nakipag-angot sa Makato Municipal Police Station ag Scene of the Crime Operatives (SOCO) para ma-imbestigahan ro hitabo.
Ro nasambit nga fetus hay ginpaidaeom eon sa laboratory samtang nagapadayun man ro imbestigasyon.
Ginpasiguro man it Makato Municipal Police Station nga magapadayun ro andang imbestigasyon para matumod kung sin-o ro nag-aywan sa fetus.
Suno kay Police Lieutenant Merriefin Carisosa, hepe it Makato PNP nga insigida sandang nakipag-coordinate sa barangay ag lokal nga gobyerno kung siin natigayun nga mai-eubong ro fetus sa Makato Municipal Cemetery.
