KALIBO, Aklan—Kapin sa 2,000 square meters nga katigbawan ro natigayon nga naabo sa nag-eontad nga grass fire bandang alas-8:00 it gabie sa Brgy. Tambuan, Malinao.
Suno kay F02 Jay Roewen Teodosio it Bureau of Fire Protection- Malinao nga nataeopangdan eon lang it mga residente maeapit sa lugar nga nagadaba daba eon ro kaeayo nga madasig nga nagkalhit bangud sa mga eaya ag mamaea nga tigbaw rason nga insigida sanda nga nag-imporma sa nasmabit nga taeatapan.
Pag-abot sa lugar hay insigidang nagpatigayon it fire fighting ro mga bombero nga nagresulta sa pagkatapna it kaeayo.
Ginapahayag nga may nataeopangdan eon nga sunog sa lugar bandang alas-5:00 it hapon apang sangkiri eamang raya ag uwa ginaeauman it mga residente nga magbahoe ro kaeayo.
May kaangtanan kara, uman nga nagpadumdom sa publiko si F02 Teodosio nga likawan gid magpilak it mga upos it sigarilyo ukon anumang plastic bottle nga makakriar it kaeayo eabi eon makaron nga tuman ro kainit it panyempo.
Mag-eowas kara, ugalion nga inde magsuga it mga eaya nga dahon ukon hilamunon nga posible man nga tunaan it kaeayo ag magkalhit sa mga kaeapit nga lugar.
