KALIBO, Aklan–Nagapabilin nga blangko ro pamilya Robiso kung sin-o ro tag-iya it nagtaeang nga bala it baril nga tumama sa andang bubungan sa bahin it Carillo Road, Brgy. Linabuan Norte, Kalibo.
Suno sa tag-ana it baeay nga si Thelma Robiso, magapahaum eon kunta sanda para magkatueog it anang mister kat nagtawag ro anang unga para magpatigayun it group picture sa pagsug-aeaw it bag-ong dag-on.
Sa mayad nga swerte suno kana hay nakabangon imaw rason nga nakalikaw sa pagtugpa it nagtaeang nga bala.
Nakibot eon lang sigon sanda pagka-aga kat matueopangdan ro gabot sa andang bubungan ag mosquitiro.
Sa andang pagpangusisa, nakakita sanda it kulay itom nga bala it owa pa matumod nga kalibre it baril nga posibleng tumama sa andang atop.
Matapos ro insidente hay insigidang sanda nga nakipag-angot sa barangay agud nga ipahisayod ro hitabo kung siin madasig man nga nagresponde ro mga kapulisan.
Eubos man ro pagpasaeamat it pamilya matapos nga owa it may tinamaan kanda.
Sa makaron, nagapadayun pa ro imbestigasyon it Kalibo Municipal Police Station angot sa insidente.
