KALIBO, Aklan—Owa nalikawan nga magkomento it sangka mangunguma angot sa nagakatabu nga owa pagka-ilintindihan sa distribusyon it pormas sa Registry System for Basic Sector in Agriculture ukon RSBSA.
Suno kay Ritzie Ruiz, sangka mangunguma sa Brgy. Manggan, Banga nga sa kamatuoran raya hay sangka manami nga programa nga eubus nga mapuslan ag maka-benepisyo sa mga kapareho nana nga mangunguma.
Apang owa raya naintindihan it pilang barangay officials rason nga nagatuga it gulo ag owa pagka-ilintindihan.
Kaeabanan sigon nga gina-isip it ibang barangay officials nga para sa ayuda ro ginapatigayon nga census ukon pagpa-rehistro sa mga farmers kabaliskaran sa pinaka-purpose it RSBSA nga mahuyap ukon matumod kon sin-o ro pwedeng makabaton it nagkaeain-eain nga benipisyo halin sa Department of Agriculture ag iba pang proyekto it gobyerno.
Haeos tanan sigon nga programa it gobyerno para sa sektor it agrikultura hay manami apang kon amat hay nagapalpak bangud sa bukon it maayos nga implementasyon sa idaeum.
Kadungan kara, nag apela imaw sa mga barangay officials nga likawan nga mahaluan it pamulitika ro nasambit nga isyu.
Dugang pa nana nga kon indi maeubtan ro programa hay magpangayo it guidelines sa DA agud nga mapaathag it husto sa nasakupan.
Bukon suno kana it ayuda ro tuyo kara kundi nga ma-align ro programa it gobyerno nga indi mauyang.
Sa mga nagakatabu sigon sa andang barangay nga matsa gina-hostage ro benepisyo para sa tawo kun sa siin indi makasamit ro bukon it kaapin.
