KALIBO, Aklan—Sangka menor de edad ag kakuncha kara nga naga-edad it 22 anyos ro gin-aresto matapos nga ginsueod ag gintakawan ro sangka baraka sa diversion road sa Brgy. Tigayon, Kalibo, pasado alas-12:00, aga-aga it Huwebes, Hulyo 4.
Parehong gindaea ro mga raya sa Kalibo Municipal Police Station para sa nagakaigo nga imbestigasyon.
Suno kay Jodelyn Magsipoc, tag-ana it baraka nga maskin nga ginbantayan nanda it anang asawa ro hueag it 17 anyos nga binatilyo, owa nanda napan-uhan nga nakasueod eon raya pinaagi sa pagsaka sa kisame.
Mag-eowas sa binatilyo hay gindakop man ro 22 anyos nga eaeaki nga ginapatihan nga look-out kara .
Raya suno kana ro kauna-unahan nga kahigayunan nga gintakawan ro andang baraka nga gintukod may daywang dag-on pa eamang ro nagtaliwan.
Bandang alas-11:45 it gabi-i hay nagbakae pa sigon ro daywa sa andang baraka apang pag-abot it tungang gabi-i hay uman nagbalik ro mga raya ag nagtinawag nga magabakae, apang owa eon nanda ginbuksan.
Nabo-oe sa binatilyo ro limang kaha it sigarilyo , sitsirya ag kwarta nga kapin sa 290 pesos ukon may kabilugan nga masobra sa 900 pesos.
Ginasugid nga ro 17-anyos nga menor de edad hay owa pa it record sa Kalibo PNP apang ro anang kaibahan nga 22 anyos hay may una eon .
Bangud sa eapnaag nga mga insidente it panakawan nga involed ro mga pamatan-on, ginpamilit it tag-ana it baraka nga mas pang hugtan ro implementasyon it curfew hours sa mga menor de edad ag dapat suno kana nga bantayan ag giyahan it mga ginikanan ro andang mga inunga.
Matapos nga madiskubre nga mag-igbata sanda it ama it binatilyo, ginpatawad nana ro mga raya ag nakadepende eon sigon sa andang mga ginikanan kon ipaidaeum ro mga raya sa counselling ukon rehabilitasyon halin sa natungdan nga ahensiya it gobyerno.
Sa pihak nga parte, abiso ni Punong Barangay Gil Morandante it Tigayon, Kalibo sa mga negosyante nga maging vigilante .
Plano man nanda nga dugangan pa ro andang mga naka install nga CCTV camera sa mga interior nga lugar.
Igapatawag man sigon nana ro ginikanan it mga eakot nga pamatan-on sa natabu nga panakawan.
