KALIBO, Aklan—Desidido nga magpasaka it kaso ro sangka miyembro it LGBTQ+ community matapos nga ginbakoe it tatlong ka mga eaeaki samtang nagamaneho it anang top down ag magabakae kunta it baboy sa Barangay Tigayon, Kalibo.
Suno sa biktima nga ginkilaea kay Chona Ramintas, residente it Barangay Pagsanghan, Banga nga samtang nagamaneho imaw it anang top down hay ginparahan imaw it sambilog sa mga suspek nga si alyas “Amo” Zaulda ag residente it Brgy. Mataphao, New Washington.
Binira pa sigon imaw sa anang alima ag gintueop sa dughan hasta nga nahueog sa anang ginamaneho nga saeakyan matapos nga birahon sa eambong.
Kasunod kara napuruhan man imaw matapos nga ginbakoe pa it daywang ka mga suspek nga si Isel Lander Iray alyas “Boboy” 17 anyos ag ro sambilog hay owa pa sa gihapon makilaea.
Nasayuran nga ro barkada ag igkampod it bitima hay dating kaaway it sambilog sa mga suspek nga si alyas Amo.
Samtang, pihak nga parte, ginpahayag man ni Diana Filomeno ro naging kaibahan it biktima nga si Ramintas nga anda eun lang nga ginbuligan it anang asawa ro biktima agud nga indi eun pagsakiton it mga suspek.
Owa man sigon nagsukoe ro biktima apang padayun ro pagpanakit it mga suspek.
