KALIBO, Aklan — Nagdangop sa Bombo Radyo ro sangka motorista matapos nga gintiketan it mga katapo it Kalibo Auxiliary Police kat gina-alegar nga nag-agi it makadali nga oras sa fast lane sa national highway nga sakop it Brgy. Estancia Kalibo, bandang alas-7:00, agahon it Biyernes, Setyembre 6.
Suno sa tagreklamo nga si Renold Florentino, owa sigon imaw it choice kundi nga mag-overtake sa anang kasunod nga saeakyan ag magsaka sa fast lane eabi pa ag nagamadali imaw bangud nga rush hour ag grabe ro traffic.
Aminado man si Florentino nga bawae nga mag-agi sa nasambit nga linya apang maabu ro naka-park sa kilid it karsada nga gintaeana para sa slow moving vehicle.
Owa suno kana ginpamatian ro anang eksplinasyon ag gintiketan gihapon it mga KAP members sa pag-eabag sa sueundanan.
Ginareklamo man nana kon ham-an nga owa naka-specify ro anang violation kun sa siin ro gin-butangan eamang it check hay ro “other matters”.
Samtang, kompleto suno kana ro anang mga dokumento sa ginamaneho nga motorsiklo ag may nagakaigo nga lisensiya.
Apela nana sa mga awtoridad nga magtau it nagakaigo nga information dissemination antes nga magpatuman it laye bag-o man ukon dati eon.
