KALIBO, Aklan–Nagapadayon makaron ro imbestigasyon it pulisya angot sa aksidente nga nag-eontad sa national highway nga sakop it Sitio Maeobog, Brgy. Lalab, Batan kon siin ginkamatay raya it sangka motorcycle driver.
Ginkilaea ro namatay nga si Kent Jasper Chua, 24-anyos, residente it Dulunan, Arevalo, Iloilo, samtang ninahan man ro anang backrider nga si Stella Mae Suarez, sa legal nga edad it probinsya it Iloilo.
Sa inisyal nga imbestigasyon it Batan PNP, halin sa syudad it Iloilo ro daywa kon siin pag-abot sa nasambit nga lugar hay nawad-an sigon it kontrol sa pagpamaneho ro driver it motorsiklo sa pakurbadang porsyon it karsada rason nga sinakop kara ro pihak nga linya.
Angot kara, gilayon nanda nga nasunggaban ro sangka saeakyan nga ginamaneho mat-a ni Freddie Malbas, 70-anyos it Brgy. Estancia, Kalibo.
Bangud sa mabaskog nga impact it pagkasunggab hay inapok ro daywa ag nawad-an it alintro.
Insigidang gindaea sa Altavas district hospital ro daywa apang bangud sa mga lastro nga naangkon sa kaeawasan hay gilayon man nga ginrefer sa pribado nga ospital iya sa banwa it Kalibo.
Apang, bangud sa fatal nga lastro sa kaeawasan, binawian it hueam nga kinabuhi si Chua samtang si Suarez hay padayon nga ginabueong sa nasambit nga ospital.
